Guddoomiyaha ururada booliska Finland, Jonne Rinne oo warbaahinta la hadlay ayaa xaqiijiyay in booliska uu gelayo muddo kooban oo shaqo-joojin ah si ay u muujiyaan rabitaankooda ku aaddan, kordhinta mushaarka oo ay muddo dalbanayeen.
Dhanka kale, hoggaanka ururada u dooda danaha booliska ayaa sheegay, in inkastoo uu boolisku shaqo-joojin cabasho ah gelayo, ay haddana ilaalinta ammaanka iyo kala dambeynta u qoondaynayaan tiro boolis ah oo hawshaas muhiimka ah sii qabata.
Si kastaba ha ahaatee, boolisku weli ma gaaran go’aan rasmi ah oo ku saabsan wakhtiga uu gelayo shaqo-joojinta iyo inta ay soconayso.
Taariikhda booliska Finland ayaa waxaa ku qoran in boolisku uu tan iyo markii la aasaasay halmar oo qura galay shaqo-joojin, markaas oo ahayd sannadkii 1976.
Haddii laga baaqsan waayo shaqo-joojintan, waxay ka dhigantahay in booliska Finland uu markii labaad gelayo shaqo-joojin.
Isha warka: Helsingin Sanomat
